བྲག་གཡབ་༧སྐྱབས་མགོན་རིན་པོ་ཆེ་མཆོག

བྲག་གཡབ་༧སྐྱབས་མགོན་བློ་ལྡན་ཤེས་རབ་རིན་པོ་ཆེ་མཆོག་གིས་”རྗར་མེ་ནི་བོད་ཀྱི་ཁང་པ་”འདི་བཞིན་དབུ་འཛུགས་གནང་བ་རེད།
ཡོ་རོབ་ཀྱི་ནང་པ་སངས་རྒྱས་པའི་ལྟ་གྲུབ་ལ་དད་ཅན་དང་། དོ་སྣང་ཡོད་པའི་ཆོས་ཚོགས་ཁག་ནས་བྲག་གཡབ ༧སྐྱབས་ མགོན་རིན་པོ་ཆེ་མཆོག་ལ་སྔ་མོ་ཞིག་ནས་ནང་ཆོས་ཀྱི་དབང་ཁྲིད་མན་ངག་གི་རིམ་པ་ གནང་སྐྱོང་ཡོང་བའི་སྐྱབས་འཇུག་རེ་འདུན་ལན་མང་ཞུས་མཐར་རིན་པོ་ཆེ་མཆོག་ནས་ལོ་ རབས་བརྒྱད་ཅུའི་སྟོད་ནས་བཟུང་གཙུག་ལག་སློབ་གྲྭའི་ཕྱག་ལས་ཞོར་སྐྱོང་ཐོག་ནས་ ཕྱི་རྒྱལ་མི་རིགས་རྣམས་ལ་གསུང་ཆོས་གནང་མགོ་གཞི་ནས་བཙུགས་ཤིང་། རིང་མིན་”ཆོས་རྫོང་”ཞེས་པའི་ཆོས་ཚོགས་དབུ་འཛུགས་འཛིན་སྐྱོང་གནང་སྟེ།
ནང་ཆོས་འཆད་སྤེལ་གྱི་མཛད་སྒོ་རིམ་འཕེལ་བྱུང་བ་རེད། དེ་རྗེས་ ༢༠༠༥ ལོར་ “ཆོས་རྫོང་”དེ་བཞིན་”རྗར་མེ་ནི་བོད་ཀྱི་ཁང་པ་”ཞེས་པའི་ངོ་བོར་བསྒྱུར་གནང་བ་རེད།

རིན་པོ་ཆེ་མཆོག་ནི་ ༡༩༤༠ ལོར་བོད་ཤར་ཕྱོགས་སུ་སྐུ་བལྟམས་ཤིང་། དགུང་གྲངས་བཞི་ཡི་སྟེང་ལ་བྲག་གཡབ་༧སྐྱབས་མགོན་སྐུ་ཕྲེང་དགུ་པའི་ཡང་སྲིད་དུ་ངོས་འཛིན་གནང་བ་ལ་བརྟེན་ནས། སྔར་ལམ་ལྟར་༧སྐྱབས་མགོན་རིན་པོ་ཆེ་མཆོག་ཁ་བ་ཅན་གྱི་སྤྲུལ་སྐུ་མཐོ་རིམ་”ནང་གི་ཧོ་ཐོག་ཐུ་”རྒྱལ་སྤྲུལ་གྱི་ཁོངས་སུ་གཏོགས་ཤིང་། གདན་ས་ཆེན་པོ་དཔལ་ལྡན་འབྲས་སྤུངས་སུ་གཞུང་ཆེན་སློབ་གཉེར་གནང་། ༡༩༥༩ ལོར་བོད་ནས་འཕགས་ཡུལ་བཙན་བྱོལ་ཕེབས་དགོས་བྱུང་སྐབས་༧གོང་ས་༧སྐྱབས་མགོན་ཆེན་པོའི་བཀའ་འབྲེལ་ཆིབས་ཞབས་སུ་ཚུད་པ་དང་། དེ་རྗེས་གཞུང་ཆེན་གསན་བཞེས་འཕྲོ་སྐྱོང་གིས་རང་གཞུང་གིས་དགེ་བཤེས་ལྷ་རམ་པའི་ཕྱག་ཁྱེར་ཕུལ་བཞེས་མཛད།
༧གོང་ས་༧སྐྱབས་མགོན་༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོ་མཆོག་དང་། སྐུའི་ཡོངས་འཛིན་རྣམ་གཉིས། ༧སྐྱབས་མགོན་ས་སྐྱ་༧གོང་མ་བདག་ཁྲི་རིན་པོ་ཆེ། བླ་མ་ཀ་ལུ་རིན་པོ་ཆེ་སོགས་ཀྱི་ཐུགས་བརྩེས་རྗེས་འཛིན་གཟིགས་བསྐྱངས་ཟབ་མོ་ཐོབ་སྟེ། ཆོས་བརྒྱུད་སོ་སོའི་མདོ་སྔགས་ཀྱི་གསན་བཞེས་རྒྱ་ཆེ་མཛད་པ་ནས་བཟུང་། ད་ལྟའི་བར་དུ་ལྗགས་བསྙེན་གྱི་རིམ་པ་དུ་མ་བསྟར་ཆགས་སུ་གནང་ཞིང་། བོད་ཕྱི་ནང་གཉིས་སུ་བོད་རིགས་སློབ་ཚོགས་སེར་སྐྱ་མང་ཚོགས་དང་བཅས་པར་དབང་བཀའ་ཁྲིད་ལུང་བཀའ་སློབ་ཀྱི་རིམ་པ་ཐེང་མང་གནང་བ་རེད།
༡༩༦༢སྐོར་ནས་བོད་གཞུང་གི་”ཤེས་རིག་རྩོམ་སྒྱུར་ཁང་”སྒོ་འབྱེད་ཐོག་ནས་དབུ་འཛིན་དང་པོ་དང་། ༡༩༦ ༤ ནས་ ༡༩༦༦ བར་རྒྱལ་ས་རྡི་ལི་གསར་པའི་བོད་ཀྱི་ཁང་པའི་དབུ་འཛིན་ཐོག་མ་དེ་གནང་། རྡི་ལིའི་བོད་ཀྱི་ཁང་པ་དེ་བཞིན་རྒྱལ་སྤྱིའི་གདེངས་འཇོགས་ཚད་མཐོ་ཡོད་པའི་བོད་ཀྱི་ཤེས་རིག་དང་། ལེགས་བྱང་གི་བསྟི་གནས་ཤིག་རེད། རིན་པོ་ཆེ་མཆོག་ཉིད་ ༡༩༦༦
ལོར་རྗར་མེ་ནིའི་་གྲོང་ཁྱེར་རྦོན་གྱི་གཙུག་ལག་སློབ་གྲྭས་གདན་ཞུས་ལྟར་ཕེབས་པ་ནས་བཟུང་། གཙུག་ལག་སློབ་གྲྭ་དེའི་ཤར་གླིང་དབུས་མའི་རིག་གཞུང་ཁང་དུ་བོད་རིག་པའི་ཐོག་སློབ་ཁྲིད་དང་། རྩོམ་སྒྲིག་གི་ཕྱག་ལས་ལོ་ངོ་སུམ་ཅུ་སོ་བརྒྱད་རིང་གནང་ཞིང་། དེ་རྗེས་སྤྱི་མཚུངས་རྒན་ཡོལ་ཐོག་ནས་བོད་ཀྱི་ཆོས་དང་རིག་གཞུང་གི་མཛད་ཁུར་སྐྱོང་བཞིན་སྐུ་ཟླ་དང་།
སྲས་སྲས་མོ་གཉེན་ལྟོས་རྣམས་ཀྱི་ཕན་ཚུན་འཚོ་སྐྱོང་ཐོག་ནས་སྤྲོ་བཞུགས་གནང་མུས་ལྟར། རིན་པོ་ཆེ་མཆོག་རྗར་མེ་ནིར་གཏན་བཞུགས་གནང་ནས་མི་ལོ་བཞི་བཅུ་ཞེ་ལྔ་འགྲོ་བཞིན་ཡོད་པ་རེད།